మన పత్రిక, వెబ్డెస్క్: జిల్లా కలెక్టర్ గురువారం వీసీ హాల్ నుంచి రెవెన్యూ, వ్యవసాయ, మార్కెటింగ్ శాఖ అధికారులతో గూగుల్ మీట్ నిర్వహించారు. ఈ సమావేశంలో పత్తి కొనుగోలు కేంద్రాల ఏర్పాటు, స్లాట్ బుకింగ్, నాణ్యత ప్రమాణాల గురించి వివరాలు చర్చించారు.
‘కపాస్ కిసాన్’ యాప్ ద్వారా రైతులు తమ పత్తిని కనీస మద్దతు ధర (క్వింటాలుకు రూ.8110) కు విక్రయించుకోవచ్చని కలెక్టర్ తెలిపారు. జిల్లాలో 7 పత్తి కొనుగోలు కేంద్రాలు ఏర్పాటు చేస్తున్నామని, రైతులు తమ ఫోన్లో యాప్ డౌన్లోడ్ చేసుకుని స్లాట్ బుక్ చేసుకోవాలని సూచించారు.
ఈ నెల 24న అన్ని గ్రామాల్లో పంచాయతీ కార్యదర్శులు, జీపీఓలు రైతులకు యాప్ ఉపయోగం ఎలా ఉంటుందో క్లుప్తంగా వివరించాలని ఆదేశించారు. మండల స్థాయిలో తహసీల్దార్లు, ఎంపీడీఓలు యాప్ గురించి విస్తృత ప్రచారం చేయాలని కూడా సూచించారు.
డిజిటల్ క్రాప్ సర్వే సమయంలో ఇచ్చిన ఫోన్ నెంబర్లు మారితే అప్డేట్ చేసుకునేలా ఏఈఓలు సహకరించాలని ఆదేశించారు. జిల్లాలో 21,21,984 క్వింటాళ్ల పత్తి దిగుబడి వస్తుందని అంచనా ఉందని తెలిపారు. నాణ్యత ప్రమాణాల పాటన, తేమ శాతం గురించి వ్యవసాయ అధికారులు రైతులకు అవగాహన కలిగించాలని కూడా సూచించారు.
సిసిఐ, వ్యవసాయ, మార్కెటింగ్ అధికారుల మధ్య సమన్వయంతో పనిచేస్తూ ఏ రైతుకు ఇబ్బంది రాకుండా చూడాలని కలెక్టర్ స్పష్టం చేశారు. ఈ సమావేశంలో జిల్లా అదనపు కలెక్టర్లు శ్రీను, సంచిత్ గంగ్వర్, ట్రైనీ కలెక్టర్ ప్రణయ్ కుమార్, డిప్యూటీ కలెక్టర్ శ్రీరామ్ ప్రణీత్, జిల్లా మార్కెటింగ్ అధికారి బాలామణి, వ్యవసాయ శాఖ అధికారి జాన్ సుధాకర్, మార్కెట్ కార్యదర్శి భారతి పాల్గొన్నారు.
Mana Patrika Web Desk is our editorial team covering breaking news, education, jobs, politics, technology, entertainment, and current affairs. The team publishes clear, accurate, and reader-friendly updates after reviewing information from reliable sources.