మన పత్రిక: బిగ్ బాస్ తెలుగు 10 ఐదో వారం నామినేషన్ల ప్రక్రియతో రసవత్తరంగా ప్రారంభమైంది. 29వ రోజు ఎపిసోడ్‌లో భాగంగా హౌస్‌మేట్స్‌కు ఒక సరికొత్త నామినేషన్ టాస్క్‌ను ఇచ్చారు. ఇందులో ఒక కంటెస్టెంట్ పండును దాచాల్సి ఉండగా, మిగిలిన ఇద్దరు దానిని వెతకాలి. ఈ టాస్క్‌లో గెలిచిన వారికి ఇద్దరిని, ఓడిపోయిన వారికి ఒకరిని నామినేట్ చేసే అధికారం లభిస్తుంది.
మొదటి రౌండ్‌లో దాచిన పండును కనిపెట్టిన రామ్ ప్రసాద్.. అమన్, త్రిగుణ్‌లను నామినేట్ చేశారు. అనంతరం ముఖేష్ కెప్టెన్సీ బాధ్యతలు, ప్రవర్తనను ప్రశ్నిస్తూ అపూర్వను నామినేట్ చేశారు. తర్వాతి రౌండ్‌లో గెలిచిన త్రిగుణ్.. అపూర్వ, అమన్‌లను నామినేట్ చేశారు. ఈ సందర్భంగా అపూర్వపై త్రిగుణ్ చేసిన వ్యాఖ్యలు ఇద్దరి మధ్య తీవ్ర వాగ్వాదానికి దారితీశాయి. అపూర్వ కూడా త్రిగుణ్‌పై ఘాటు వ్యాఖ్యలు చేశారు. గత విభేదాలను ప్రస్తావిస్తూ అమన్.. ముఖేష్‌ను నామినేట్ చేశారు.
ఆ తర్వాత జరిగిన రౌండ్‌లో వర్షిణి పండును కనుగొని రోహిత్, అపూర్వలను నామినేట్ చేయగా, శాలిని కూడా త్రిగుణ్‌ను నామినేట్ చేశారు. తాము డేంజర్ జోన్‌లో ఉన్నందున ఎక్కువ మంది కంటెస్టెంట్లను నామినేషన్ ప్రక్రియలోకి తీసుకురావాలని రోహిత్ తన అగ్నిపరీక్ష టీమ్‌కు వ్యూహాత్మకంగా సూచించారు. శాలిని త్రిగుణ్‌ను నామినేట్ చేయడం రోహిత్ వ్యూహంలో భాగమేనని తెలుస్తోంది. ఈ నామినేషన్ల ప్రక్రియ హౌస్‌లో కంటెస్టెంట్ల మధ్య కొత్త ఉద్రిక్తతలకు కారణమైంది.
Farooq Basha is a content writer with two years of experience covering education, jobs, politics, technology, entertainment, and current affairs. He writes clear, accurate, and easy-to-understand articles for everyday readers.