ఇంటర్ విద్యార్థులకు గుడ్ న్యూస్: వాట్సాప్‌లోకే హాల్ టికెట్లు..

మన పత్రిక, వెబ్​డెస్క్: తెలంగాణ ఇంటర్మీడియట్ బోర్డు విద్యార్థుల కోసం విప్లవాత్మక నిర్ణయం తీసుకుంది. ఇకపై హాల్ టికెట్ల కోసం కళాశాలల చుట్టూ తిరగాల్సిన అవసరం లేకుండా, నేరుగా విద్యార్థుల తల్లిదండ్రుల వాట్సాప్‌ (WhatsApp) నంబర్లకే పంపించాలని నిర్ణయించింది.

ముందే ఎందుకు? వచ్చే ఏడాది ఫిబ్రవరి 25 నుంచి ఇంటర్ పరీక్షలు ప్రారంభం కానున్నాయి. ఈ నేపథ్యంలో సుమారు 45 రోజుల నుంచి రెండు నెలల ముందే హాల్ టికెట్లను తల్లిదండ్రుల ఫోన్లకు పంపనున్నారు. హాల్ టికెట్లలో ఏమైనా తప్పులు (పేరు, ఫోటో, సబ్జెక్టులు) ఉంటే ముందే గుర్తించి సరిదిద్దుకునే అవకాశం కల్పించడమే దీని ముఖ్య ఉద్దేశం.

తల్లిదండ్రులు ఏం చేయాలి? వాట్సాప్‌లో హాల్ టికెట్ రాగానే అందులోని వివరాలను క్షుణ్ణంగా పరిశీలించాలి. హాల్ టికెట్ నంబర్, పరీక్షా కేంద్రం చిరునామా, ఏ రోజు ఏ పరీక్ష జరుగుతుందో చూసుకోవాలి. ఒకవేళ వివరాల్లో ఏమైనా తప్పులు ఉంటే వెంటనే సంబంధిత కళాశాల ప్రిన్సిపాల్ దృష్టికి తీసుకెళ్లాలని బోర్డు సూచించింది. ప్రస్తుతం అధిక శాతం మంది తల్లిదండ్రుల వద్ద స్మార్ట్ ఫోన్లు ఉన్నందున ఈ నిర్ణయం తీసుకున్నట్లు అధికారులు తెలిపారు.