హైదరాబాద్లో మూసీ నది ఉగ్రరూపం దాల్చడంతో లోతట్టు ప్రాంతాలు నీట మునిగాయి. ఎంజీబీఎస్ నుంచి పురానాపూల్ వరకు జనజీవనం స్తంభించింది. భారీ వర్షాలతో హిమాయత్సాగర్, ఉస్మాన్సాగర్ గేట్లు తెరవడంతో 14,000 క్యూసెక్కుల నీరు మూసీలోకి వచ్చి చేరింది. ఇది ప్రకృతి వైపరీత్యం. కానీ, ఈ విపత్తును రాజకీయంగా మలిచే ప్రయత్నాలు ప్రారంభమయ్యాయి. బీఆర్ఎస్ వర్కింగ్ ప్రెసిడెంట్ కేటీ రామారావు (కేటీయార్) చేసిన వ్యాఖ్యలు ఇప్పుడు చర్చనీయాంశంగా మారాయి.
తాజా సమాచారం ప్రకారం, మూసీ సుందరీకరణ పేరుతో లక్షన్నర కోట్ల రూపాయల పథకాన్ని అవకాశంగా తీసుకుని, ఇళ్ల కూల్చివేతలు చేయలేకపోయిన తర్వాత, రెండు జలాశయాల గేట్లు ఒకేసారి ఎత్తించి వరద నీటిని కబ్జాలను కొట్టేయడానికి ప్రయత్నించారని కేటీయార్ ఆరోపించారు. ఇది ప్రకృతి విపత్తుపై రాజకీయ లబ్ధి చూసే ప్రయత్నమని విమర్శలు వస్తున్నాయి.
ప్రకృతి వైపరీత్యాలను రాజకీయం చేయడం యుక్తాయుక్త విచక్షణకు విరుద్ధం. క్లౌడ్ బరస్ట్లు, భారీ వర్షాలు ప్రపంచవ్యాప్తంగా పెరుగుతున్నాయి. క్యాచ్మెంట్ ఏరియాలో నీటి ప్రవాహం 30–40 వేల క్యూసెక్కులకు చేరడంతో గేట్లు తెరవడం అనివార్యం. లేకపోతే జలాశయాలు పగిలిపోయే ప్రమాదం ఉంది. 1908లో హైదరాబాద్లో సంభవించిన వరద బీభత్సం మళ్లీ పునరావృతం కాకుండా ఉండాలంటే ఇది అత్యవసరం.
అయితే, ప్రకృతి మాత్రమే దోషి కాదు. మూసీ నదీ ప్రవాహ మార్గంలో అక్రమ కబ్జాలు, నిర్మాణాలు పెరిగిపోయాయి. మూసారాంబాగ్ వంతెన సమీపంలో పెట్రోల్ బంక్, గుడి, ఇళ్లు నది మధ్యలోనే ఉన్నాయి. ఇలా మూసీ పొడవునా కబ్జాలు పెచ్చుమీరాయి. రియల్ ఎస్టేట్ స్వార్థాల కోసం 111 జీవో ఉన్నప్పటికీ, కేసీఆర్ ప్రభుత్వం కూడా ఈ జలాశయాలను ఎండబెట్టాలని ప్రయత్నించిందని గుర్తుచేస్తున్నారు.
మూసీ వరదలు ప్రకృతి హెచ్చరికగా కూడా పనిచేస్తున్నాయి. నది తన ప్రవాహ మార్గాన్ని స్పష్టం చేస్తోంది. ఇళ్లు ఖాళీ చేయించి, ప్రజలకు పక్కా ఇళ్లు కట్టించి, నది దారిని క్లియర్ చేయాలని సందేశం ఇస్తోంది. ముఖ్యమంత్రి రేవంత్ రెడ్డి ప్రతిపాదించిన మూసీ ప్రక్షాళన, సుందరీకరణ పథకానికి ప్రకృతే సహకరిస్తోందా అనే ప్రశ్న ఉత్పన్నమవుతోంది.
విపత్తు సమయంలో సంయమనం పాటించి, ప్రజలకు సహాయం చేయడమే నాయకత్వం. రాజకీయ లబ్ధి కోసం బురద జల్లడం కాదు. ఇంకా వివరాలు త్వరలో వెల్డి కానున్నాయి.
Mana Patrika Web Desk is our editorial team covering breaking news, education, jobs, politics, technology, entertainment, and current affairs. The team publishes clear, accurate, and reader-friendly updates after reviewing information from reliable sources.