మన పత్రిక: వైవిధ్యభరిత నటుడు కమల్ హాసన్, ప్రముఖ దర్శకుడు శంకర్ కలయికలో రానున్న ‘ఇండియన్ 3’ చిత్ర పనులు త్వరలోనే మళ్లీ ప్రారంభమయ్యే అవకాశం ఉన్నట్లు ప్రచారం జరుగుతోంది. గతంలో విడుదలైన ‘ఇండియన్ 2’ ఆశించిన స్థాయిలో విజయం సాధించకపోవడంతో ‘ఇండియన్ 3’ ప్రాజెక్టును తాత్కాలికంగా పక్కన పెట్టారు. ప్రస్తుతం ఈ సినిమాను మళ్లీ ముందుకు తీసుకెళ్లేందుకు సన్నాహాలు చేస్తున్నట్లు తాజా సమాచారం.
వాస్తవానికి ‘ఇండియన్ 2’ చిత్రీకరణ సమయంలోనే ‘ఇండియన్ 3’కి సంబంధించిన మెజారిటీ భాగాన్ని పూర్తి చేశారు. ఈ సినిమా కోసం కొత్తగా భారీగా షూటింగ్ చేయాల్సిన అవసరం లేదని, కేవలం కొద్దిపాటి ప్యాచ్ వర్క్ మాత్రమే మిగిలి ఉందని తెలుస్తోంది. అయితే, చిత్రానికి సంబంధించి కంప్యూటర్ గ్రాఫిక్స్ (సీజీ) పనులు మాత్రం భారీ స్థాయిలో పెండింగ్లో ఉన్నట్లు సమాచారం.
ఈ చిత్రంలో కమల్ హాసన్ మరోసారి సేనాపతి పాత్రలో కనిపించనుండగా, శంకర్ దర్శకత్వం వహిస్తున్నారు. మిగిలిపోయిన పనులను పూర్తి చేసి ప్రాజెక్టును పట్టాలెక్కించాలని నిర్మాతలు భావిస్తున్నట్లు వార్తలు వస్తున్నప్పటికీ, దీనిపై ఇప్పటివరకు ఎలాంటి అధికారిక ప్రకటన వెలువడలేదు. ఈ క్రమంలో సినిమా నిర్మాణ, విడుదల ప్రణాళికలపై స్పష్టత కోసం కమల్ హాసన్ అభిమానులు ఎదురుచూస్తున్నారు.
Mana Patrika Web Desk is our editorial team covering breaking news, education, jobs, politics, technology, entertainment, and current affairs. The team publishes clear, accurate, and reader-friendly updates after reviewing information from reliable sources.