దేశవ్యాప్తంగా వినాయకచవితి వేడుకలు అత్యంత వైభవంగా ప్రారంభమయ్యాయి. ఊరూవాడలాంటి ప్రాంతాలన్నీ వినాయక మండపాలతో ఆధ్యాత్మిక శోభను సంతరించుకున్నాయి. విభిన్న రూపాల్లో కొలువుదీరిన గణనాథుల ప్రతిమలతో ఎటు చూసినా పండుగ వాతావరణం కనిపిస్తోంది. దేశవ్యాప్తంగా ఉన్న ఆలయాలన్నీ గణపతి నామస్మరణలతో మార్మోగుతున్నాయి.
ఇక హైదరాబాద్లోని చారిత్రక ఖైరతాబాద్ మహాగణపతి దర్శనాలు కన్నులపండువగా ప్రారంభమయ్యాయి. రాష్ట్ర గవర్నర్ శివ ప్రతాప్ శుక్లా దంపతులు విగ్రహానికి తొలిపూజలు నిర్వహించి, స్వామివారికి పట్టువస్త్రాలు సమర్పించారు. అంతకుముందు విగ్రహ కమిటీ సభ్యులు, మంత్రి పొన్నం ప్రభాకర్, స్థానిక ఎమ్మెల్యే దానం నాగేందర్లు గవర్నర్కు ఘన స్వాగతం పలికి వేదిక వద్దకు తీసుకెళ్లారు. అనంతరం అర్చకులు వైభవంగా పూజలు జరిపించారు. మంత్రి పొన్నం ప్రభాకర్ కూడా స్వామివారికి పట్టువస్త్రాలు సమర్పించగా, పద్మశాలి సంఘం ఆధ్వర్యంలో భారీ కండువా, యజ్ఞోపవీతం సమర్పించారు.
ఈ ఏడాది ఖైరతాబాద్ బడా గణేశ్ ‘శ్రీ పంచముఖ సంకటహర మహాగణపతి’ రూపంలో భక్తులకు అభయమిస్తున్నారు. పర్యావరణ హితంగా సుమారు 69 అడుగుల ఎత్తులో ఈ ప్రతిమను తీర్చిదిద్దారు. ఉత్సవాల కోసం అధికారులు పటిష్టమైన ఏర్పాట్లు చేశారు. భక్తులకు ఎలాంటి అసౌకర్యం కలగకుండా ప్రత్యేక క్యూలైన్లు ఏర్పాటు చేయగా, పరిసర ప్రాంతాల్లో 12 రోజుల పాటు ట్రాఫిక్ ఆంక్షలు అమల్లో ఉంటాయని అధికారులు తెలిపారు.
Lavanya is a content writer at Mana Patrika, covering useful updates and information for Telugu readers. She writes about education, jobs, current affairs, technology, entertainment, and other topics that are relevant to everyday readers. Her focus is on presenting information in a clear, simple, and easy-to-understand way.