40 ఏళ్ల అనుబంధం కట్.. కారెక్కనున్న జీవన్ రెడ్డి..?

మన పత్రిక, TG: తెలంగాణ సీనియర్ నేత టి జీవన్ రెడ్డి బీఆర్ఎస్‌లో చేరికకు రంగం సిద్ధమైనట్లు రాజకీయ వర్గాల్లో చర్చ జరుగుతోంది. ఈ నెల 13న ఆయన భారత్ రాష్ట్ర సమితి కండువా కప్పుకునే అవకాశం ఉందని సమాచారం. ముందుగా ఈ నెల 7న జగిత్యాలకు వెళ్లనున్న కేటీఆర్ జీవన్ రెడ్డిని కలిసి పార్టీలోకి ఆహ్వానించనున్నట్లు తెలుస్తోంది. అమెరికా పర్యటన ముగించుకుని వచ్చిన వెంటనే ఈ చర్చలు వేగం పుంజుకునే అవకాశం ఉందని పార్టీ వర్గాలు చెబుతున్నాయి.ఇటీవల ఇండియన్ నేషనల్ కాంగ్రెస్లో జరుగుతున్న పరిణామాలపై అసంతృప్తి వ్యక్తం చేసిన జీవన్ రెడ్డి, గత నెల 25న పార్టీకి రాజీనామా చేసి 40 ఏళ్ల అనుబంధానికి ముగింపు పలికారు. దీంతో ఆయన తదుపరి రాజకీయ అడుగుపై ఆసక్తి నెలకొంది.

ఇదిలా ఉండగా, జీవన్ రెడ్డి చేరికను ప్రతిష్టాత్మకంగా తీసుకున్న బీఆర్ఎస్ అధిష్ఠానం, ఈ పరిణామాన్ని ఉపయోగించుకుని పార్టీకి నూతన ఉత్సాహం తీసుకురావాలని వ్యూహం రచిస్తోంది. ఆయన చేరిక అనంతరం జగిత్యాల వేదికగా భారీ స్థాయిలో ప్లీనరీ నిర్వహించాలని కే చంద్రశేఖర్ రావు యోచిస్తున్నట్లు సమాచారం. క్షేత్ర స్థాయిలో శ్రేణులకు నూతన జోష్ తీసుకురావడంతో పాటు కీలక నేతలకు ప్రాధాన్యం ఉంటుందనే సంకేతాలు ఇవ్వాలని పార్టీ భావిస్తున్నట్లు తెలుస్తోంది.