మన పత్రిక: నీట్ (NEET) పేపర్ లీక్ అంశంపై విద్యార్థులు లేవనెత్తిన ప్రశ్నలను మరియు సమస్యలను రాజకీయ ప్రయోజనాల కోసం వాడుకోవడం దురదృష్టకరమని కేంద్ర మంత్రి జేపీ నడ్డా అన్నారు. ఢిల్లీలోని బీజేపీ ప్రధాన కార్యాలయంలో ఆయన మీడియాతో మాట్లాడుతూ, కాంగ్రెస్ నాయకుడు రాహుల్ గాంధీకి విద్యార్థుల సంక్షేమంపై శ్రద్ధ లేదని విమర్శించారు. కేవలం రాజకీయ లబ్ధి కోసమే విద్యార్థులను రెచ్చగొడుతున్నారని ఆయన మండిపడ్డారు.
గతంలో కాంగ్రెస్ పాలిత రాష్ట్రాల్లో కూడా పేపర్లు లీక్ అయ్యాయని జేపీ నడ్డా గుర్తు చేశారు. హిమాచల్ ప్రదేశ్, ఝార్ఖండ్, తెలంగాణలో ఇంటర్ పేపర్ లీక్ సహా కేరళ, తమిళనాడు, పశ్చిమ బెంగాల్ మరియు కర్ణాటక రాష్ట్రాల్లో జరిగిన పేపర్ లీక్ ఉదంతాలను ఆయన ప్రస్తావించారు. నీట్ అంశంపై తమ ప్రభుత్వం బాధ్యతాయుతంగా వ్యవహరిస్తోందని, పార్లమెంటులో ఈ అంశంపై చర్చించడానికి తాము సిద్ధంగా ఉన్నామని నడ్డా స్పష్టం చేశారు. రాజకీయ పోరాటాలకు ఇది సరైన సమయం కాదని, పార్లమెంటు మాత్రమే ఇటువంటి తీవ్రమైన అంశాలను చర్చించడానికి సరైన వేదిక అని ఆయన పేర్కొన్నారు.
Farooq Basha is a content writer with two years of experience covering education, jobs, politics, technology, entertainment, and current affairs. He writes clear, accurate, and easy-to-understand articles for everyday readers.