TGSRTC Recruitment 2026 : ఆర్టీసీలో 198 ఉద్యోగాలు షెడ్యూల్ విడుదల చేసిన అధికారులు

మన పత్రిక వెబ్​డెస్క్, హైదరాబాద్: తెలంగాణ రాష్ట్ర రోడ్డు రవాణా సంస్థ (TGSRTC)లో ఖాళీగా ఉన్న పోస్టుల భర్తీ ప్రక్రియ వేగవంతమైంది. సంస్థలో ట్రాఫిక్ సూపర్ వైజర్ ట్రైనీ, మెకానికల్ సూపర్ వైజర్ ట్రైనీ పోస్టుల నియామకాల కోసం నిర్వహించాల్సిన రాత పరీక్ష తేదీలను అధికారులు అధికారికంగా ప్రకటించారు. ఈ మేరకు తెలంగాణ స్టేట్ లెవల్ పోలీస్ రిక్రూట్‌మెంట్ బోర్డు (TSLPRB) ఛైర్మన్ తాజా షెడ్యూల్‌ను విడుదల చేశారు.

ప్రకటించిన షెడ్యూల్ ప్రకారం, మార్చి 29వ తేదీన ఈ పరీక్షలు జరగనున్నాయి. ఆ రోజు ఉదయం 10 గంటల నుంచి మధ్యాహ్నం 1 గంట వరకు ట్రాఫిక్ సూపర్ వైజర్ ట్రైనీ (TST) అభ్యర్థులకు పరీక్ష నిర్వహిస్తారు. అలాగే, అదే రోజు మధ్యాహ్నం 2.30 గంటల నుంచి సాయంత్రం 5.30 గంటల వరకు మెకానికల్ సూపర్ వైజర్ ట్రైనీ (MST) అభ్యర్థులకు పరీక్ష ఉంటుంది.

ఈ నోటిఫికేషన్ ద్వారా మొత్తం 198 ఖాళీలను భర్తీ చేయనున్నారు. ఇందులో 84 ట్రాఫిక్ సూపర్ వైజర్ పోస్టులు ఉండగా, 114 మెకానికల్ సూపర్ వైజర్ పోస్టులు ఉన్నాయి. ఈ ఉద్యోగాల కోసం రాష్ట్రవ్యాప్తంగా నిరుద్యోగుల నుంచి భారీగానే స్పందన లభించింది. ట్రాఫిక్ సూపర్ వైజర్ పోస్టులకు 20,097 మంది, మెకానికల్ సూపర్ వైజర్ పోస్టులకు 6,063 మంది అభ్యర్థులు దరఖాస్తు చేసుకున్నట్లు అధికారులు గణాంకాలను వెల్లడించారు.

రాత పరీక్షను మొత్తం 200 మార్కులకు ఆబ్జెక్టివ్ విధానంలో (మల్టిపుల్ ఛాయిస్) నిర్వహిస్తారు. పరీక్ష రాయడానికి అభ్యర్థులకు మూడు గంటల సమయం కేటాయించారు. అభ్యర్థులు తమ హాల్ టికెట్లను పరీక్ష తేదీకి కొద్ది రోజుల ముందు నుంచి https://www.tgprb.in/ అధికారిక వెబ్‌సైట్ ద్వారా డౌన్లోడ్ చేసుకోవచ్చని బోర్డు సూచించింది. హాల్ టికెట్ల విడుదలకు సంబంధించిన కచ్చితమైన తేదీని త్వరలోనే ప్రకటిస్తామని తెలిపింది.