టీజీ లాసెట్ నోటిఫికేషన్ విడుదల: మే 18న పరీక్ష.. ఫిబ్రవరి 10 నుంచి దరఖాస్తులు ప్రారంభం

మన పత్రిక వెబ్​డెస్క్, హైదరాబాద్: న్యాయవాద వృత్తిని కెరీర్‌గా ఎంచుకోవాలనుకునే విద్యార్థులకు తెలంగాణ ఉన్నత విద్యా మండలి శుభవార్త చెప్పింది. రాష్ట్రంలోని న్యాయ కళాశాలల్లో ప్రవేశాలకు నిర్వహించే ‘తెలంగాణ లా కామన్ ఎంట్రన్స్ టెస్ట్’ (TG LAWCET – 2026) నోటిఫికేషన్ అధికారికంగా విడుదలైంది. 2026-2027 విద్యా సంవత్సరానికి గానూ మూడేళ్లు, ఐదేళ్ల ఎల్‌ఎల్‌బీ కోర్సులతో పాటు రెండేళ్ల ఎల్‌ఎల్‌ఎం పీజీ కోర్సులో సీట్ల భర్తీకి ఈ నోటిఫికేషన్ జారీ చేశారు. అర్హత, ఆసక్తి ఉన్న అభ్యర్థులు ఫిబ్రవరి 10వ తేదీ నుంచి ఆన్‌లైన్ ద్వారా దరఖాస్తు చేసుకోవచ్చని కన్వీనర్ వెల్లడించారు. ఇంటర్మీడియట్ పూర్తి చేసిన వారు ఐదేళ్ల ఎల్‌ఎల్‌బీ కోర్సుకూ, డిగ్రీ అర్హత ఉన్నవారు మూడేళ్ల ఎల్‌ఎల్‌బీ కోర్సుకూ దరఖాస్తు చేసుకోవడానికి అర్హులు. అలాగే లా డిగ్రీ పూర్తి చేసిన వారు ఎల్‌ఎల్‌ఎం ప్రవేశ పరీక్ష రాయవచ్చు.

దరఖాస్తుల ప్రక్రియకు సంబంధించిన ముఖ్యమైన తేదీలను కూడా అధికారులు ప్రకటించారు. అభ్యర్థులు ఎలాంటి ఆలస్య రుసుము (ఫైన్) లేకుండా ఏప్రిల్ 1వ తేదీ వరకు దరఖాస్తు చేసుకోవచ్చు. ఒకవేళ ఆ తేదీ దాటితే, నిర్ణీత ఆలస్య రుసుముతో మే 13వ తేదీ వరకు అవకాశం కల్పించారు. రూ.500 నుంచి మొదలై గరిష్టంగా రూ.10,000 వరకు లేట్ ఫీజు ఉంటుంది. దరఖాస్తు రుసుము విషయానికి వస్తే.. ఎస్సీ, ఎస్టీ, దివ్యాంగ అభ్యర్థులు రూ.900, జనరల్ అభ్యర్థులు రూ.1100 చెల్లించాల్సి ఉంటుంది. ఎల్‌ఎల్‌ఎం (PGLCET) రాసే వారికి కూడా ఇదే ఫీజు వర్తిస్తుంది. మే 12వ తేదీ నుంచి హాల్ టికెట్లు డౌన్లోడ్ చేసుకోవచ్చు.

లాసెట్ ప్రవేశ పరీక్షను మే 18వ తేదీన నిర్వహించనున్నారు. ఆ రోజు మూడు సెషన్లలో పరీక్ష జరుగుతుంది. ఉదయం 9.30 నుంచి 11 గంటల వరకు మొదటి సెషన్, మధ్యాహ్నం 12.30 నుంచి 2 గంటల వరకు రెండో సెషన్ మూడేళ్ల ఎల్‌ఎల్‌బీ అభ్యర్థులకు కేటాయించారు. ఇక సాయంత్రం 4 గంటల నుంచి 5.30 గంటల వరకు జరిగే మూడో సెషన్‌లో ఐదేళ్ల ఎల్‌ఎల్‌బీ మరియు ఎల్‌ఎల్‌ఎం అభ్యర్థులకు పరీక్ష నిర్వహిస్తారు. మొత్తం 120 మార్కులకు ఈ పరీక్ష ఉంటుంది. పరీక్ష అనంతరం మే 23న ప్రాథమిక ‘కీ’ విడుదల చేసి, అభ్యంతరాలను స్వీకరించిన తర్వాత జూన్ 5న తుది ఫలితాలను ప్రకటించనున్నారు. ఆసక్తి గల అభ్యర్థులు పూర్తి వివరాల కోసం https://lawcet.tgche.ac.in/ అధికారిక వెబ్‌సైట్‌ను సందర్శించవచ్చు. గత కొన్నేళ్లుగా లా కోర్సులకు డిమాండ్ పెరుగుతుండటంతో ఈసారి కూడా భారీగా పోటీ ఉండే అవకాశం ఉంది.