TG SSC Exams 2026: ఫీజు చెల్లింపునకు మరో ఛాన్స్.. షెడ్యూల్ ఇదే!

మన పత్రిక వెబ్​డెస్క్, హైదరాబాద్: తెలంగాణ పదో తరగతి విద్యార్థులకు విద్యాశాఖ అధికారులు శుభవార్త అందించారు. అనివార్య కారణాల వల్ల ఇంకా పరీక్ష ఫీజు చెల్లించని విద్యార్థులకు మరో అవకాశాన్ని కల్పించారు. ఇప్పటికే పలుమార్లు గడువు పొడిగించినప్పటికీ, తాజాగా ‘తత్కాల్ పథకం’ (Tatkal Scheme) కింద ఫీజు చెల్లించేందుకు వెసులుబాటు కల్పించారు. అలాగే మార్చిలో జరగనున్న పరీక్షల షెడ్యూల్‌పై విద్యార్థులకు స్పష్టత ఇచ్చారు.

రూ.1000 ఆలస్య రుసుముతో.. పరీక్ష ఫీజు చెల్లింపు గడువు ఇప్పటికే ముగిసినా, విద్యార్థుల భవిష్యత్తును దృష్టిలో ఉంచుకుని అధికారులు ఈ నిర్ణయం తీసుకున్నారు. తత్కాల్ పథకం కింద రూ.1000 ఆలస్య రుసుముతో ఈ నెల (జనవరి) 21 నుంచి 27వ తేదీ వరకు ఫీజు చెల్లించవచ్చు. సంబంధిత హెడ్ మాస్టర్లు విద్యార్థుల సమాచారాన్ని జనవరి 29వ తేదీలోపు డీఈవోలకు సమర్పించాల్సి ఉంటుంది. ఇదే చివరి అవకాశమని, ఇకపై గడువు పొడిగింపు ఉండదని అధికారులు స్పష్టం చేశారు. మరిన్ని వివరాల కోసం https://bse.telangana.gov.in/ వెబ్‌సైట్‌ను సందర్శించవచ్చు.

పరీక్షల షెడ్యూల్ 2026 మరోవైపు టెన్త్ పబ్లిక్ పరీక్షల టైమ్ టేబుల్ కూడా విడుదలైంది. 2026 మార్చి 14న (శనివారం) పరీక్షలు ప్రారంభమై, ఏప్రిల్ 16న ముగుస్తాయి.

• పరీక్ష సమయం: ఉదయం 9:30 గంటల నుంచి మధ్యాహ్నం 12:30 గంటల వరకు.
• సైన్స్ పేపర్లు: ఫిజికల్ సైన్స్, బయోలాజికల్ సైన్స్ పరీక్షలు మాత్రం ఉదయం 9:30 నుంచి 11:00 గంటల వరకు మాత్రమే జరుగుతాయి. పార్ట్-బి (బిట్ పేపర్)కి చివరి 15 నిమిషాలు కేటాయిస్తారు.

ముఖ్యమైన తేదీలు ఇవే:

• మార్చి 14 (శనివారం): ఫస్ట్ లాంగ్వేజ్
• మార్చి 18 (బుధవారం): సెకండ్ లాంగ్వేజ్
• మార్చి 23 (సోమవారం): థర్డ్ లాంగ్వేజ్ (ఇంగ్లీష్)
• మార్చి 28 (శనివారం): మ్యాథమెటిక్స్
• ఏప్రిల్ 02 (గురువారం): ఫిజికల్ సైన్స్
• ఏప్రిల్ 07 (మంగళవారం): బయోలాజికల్ సైన్స్
• ఏప్రిల్ 13 (సోమవారం): సోషల్ స్టడీస్

విద్యార్థులు ఈ చివరి అవకాశాన్ని వినియోగించుకోవాలని, పరీక్షల సమయాల్లో మార్పులను గమనించాలని అధికారులు సూచించారు.