మన పత్రిక వెబ్డెస్క్, హైదరాబాద్: ప్రైవేటు విద్యా సంస్థలకు దీటుగా ప్రభుత్వ పాఠశాలలను బలోపేతం చేసేందుకు తెలంగాణ ప్రభుత్వం (Telangana Government) వడివడిగా అడుగులు వేస్తోంది. ఇందులో భాగంగా గ్రామీణ ప్రాంతాల్లోని ప్రభుత్వ బడుల్లో ‘ప్రీ ప్రైమరీ’ (Pre-Primary) విద్యను ప్రవేశపెట్టేందుకు సిద్ధమవుతోంది. అంతేకాకుండా, చిన్నారులను పాఠశాలలకు తీసుకెళ్లేందుకు ప్రత్యేక రవాణా సౌకర్యం కల్పించే ఆలోచనలో ఉన్నట్లు ముఖ్యమంత్రి రేవంత్ రెడ్డి వెల్లడించారు. హిమాచల్ ప్రదేశ్ విద్యాశాఖ మంత్రి రోహిత్ ఠాకూర్ నేతృత్వంలోని ప్రతినిధి బృందం సచివాలయంలో ముఖ్యమంత్రిని కలిసిన సందర్భంగా ఆయన ఈ విషయాలను పంచుకున్నారు.
త్వరలో కొత్త విద్యా విధానం జాతీయ విద్యా విధానం తరహాలోనే తెలంగాణలోనూ త్వరలో ప్రత్యేక విద్యా విధానాన్ని తీసుకురాబోతున్నట్లు సీఎం తెలిపారు. దీనికోసం ఇప్పటికే ఒక ఉన్నతస్థాయి కమిటీని నియమించామని, త్వరలోనే ఆ పాలసీని అమలులోకి తెస్తామని స్పష్టం చేశారు. విద్యా వ్యవస్థను పటిష్టపరచడమే తమ ప్రభుత్వ లక్ష్యమని పేర్కొన్నారు.
మినీ యూనివర్సిటీలుగా ‘యంగ్ ఇండియా’ స్కూల్స్ విద్యా రంగంలో సమూల మార్పుల్లో భాగంగా ‘యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్’ (YIIRS) ఏర్పాటు చేస్తున్నట్లు సీఎం వివరించారు.
- ప్రతి నియోజకవర్గంలో 20 నుంచి 25 ఎకరాల సువిశాల విస్తీర్ణంలో వీటిని నిర్మిస్తున్నారు.
- ఒక్కో స్కూల్ నిర్మాణానికి రూ.200 కోట్లు వెచ్చిస్తున్నారు.
- ఎస్సీ, ఎస్టీ, బీసీ, మైనారిటీ విద్యార్థులకు ఒకేచోట అంతర్జాతీయ ప్రమాణాలతో విద్యనందించేలా వీటిని ‘మినీ యూనివర్సిటీ’ స్థాయిలో తీర్చిదిద్దుతున్నారు.
ఐటీఐలు ఇక ఏటీసీలు రాష్ట్రంలోని ఐటీఐలను అడ్వాన్స్డ్ ట్రైనింగ్ సెంటర్లుగా (ATCs) మారుస్తున్నామని, ప్రతి నియోజకవర్గంలో ఒక ఏటీసీని ఏర్పాటు చేస్తున్నామని సీఎం తెలిపారు. ఏటీసీగా మార్చిన మల్లేపల్లి ఐటీఐని సందర్శించాలని హిమాచల్ మంత్రికి సూచించారు. తెలంగాణ ప్రభుత్వం చేపడుతున్న సంస్కరణలు, ఇంటిగ్రేటెడ్ స్కూల్స్ నిర్మాణంపై హిమాచల్ మంత్రి ఆసక్తి కనబరిచారు.
Mana Patrika Web Desk is our editorial team covering breaking news, education, jobs, politics, technology, entertainment, and current affairs. The team publishes clear, accurate, and reader-friendly updates after reviewing information from reliable sources.