‘పరీక్షా పే చర్చ 2026’ దరఖాస్తుకు నేడే లాస్ట్ డేట్..

మన పత్రిక వెబ్​డెస్క్, న్యూఢిల్లీ: ప్రధాని నరేంద్ర మోదీ విద్యార్థులతో ముచ్చటించే ప్రతిష్టాత్మక కార్యక్రమం ‘పరీక్షా పే చర్చ’ (Pariksha Pe Charcha – PPC 2026) 9వ ఎడిషన్‌కు సమయం ఆసన్నమైంది. ఈ కార్యక్రమంలో పాల్గొనేందుకు రిజిస్ట్రేషన్లకు నేడే (జనవరి 11) ఆఖరు తేదీ. ప్రధానితో నేరుగా మాట్లాడే అరుదైన అవకాశాన్ని అందుకోవాలనుకునే విద్యార్థులు, ఉపాధ్యాయులు, తల్లిదండ్రులు వెంటనే దరఖాస్తు చేసుకోవాలని అధికారులు సూచించారు.

రిజిస్ట్రేషన్ల సునామీ ఈ ఏడాది పీపీసీకి అసాధారణ స్పందన లభించింది. గతేడాది 3.53 కోట్ల రిజిస్ట్రేషన్లతో నెలకొల్పిన ‘గిన్నిస్ వరల్డ్ రికార్డ్’ను బద్దలు కొడుతూ.. ఈసారి ఏకంగా 4,30,18,173 మంది (4.3 కోట్లు) దరఖాస్తు చేసుకున్నారు.

• విద్యార్థులు: సుమారు 4 కోట్లు
• టీచర్లు: 24 లక్షలు
• తల్లిదండ్రులు: 5.7 లక్షలు

ఎవరు అర్హులు? – ప్రయోజనాలు ఏంటి?

• 6 నుంచి 12వ తరగతి చదువుతున్న విద్యార్థులు, వారి తల్లిదండ్రులు, ఉపాధ్యాయులు దీనికి అర్హులు.
• దరఖాస్తు చేసుకున్న ప్రతి ఒక్కరికీ ప్రభుత్వం నుంచి అధికారిక ‘పార్టిసిపేషన్ సర్టిఫికేట్’ అందుతుంది.
• ‘మై గవ్’ (MyGov) పోర్టల్‌లో నిర్వహించే మల్టిపుల్ ఛాయిస్ క్వశ్చన్ (MCQ) పోటీ ద్వారా ఎంపికైన వారు ప్రధానిని నేరుగా పరీక్షల ఒత్తిడి, కెరీర్ ప్లానింగ్‌పై ప్రశ్నలు అడిగే అవకాశం ఉంటుంది.

రిజిస్ట్రేషన్ చేసుకోండిలా..

1. అధికారిక వెబ్‌సైట్ innovateindia1.mygov.in ను సందర్శించండి.
2. హోమ్ పేజీలో ఉన్న ‘Pariksha Pe Charcha 2026’ లింక్‌పై క్లిక్ చేయండి.
3. మీ వివరాలతో లాగిన్ అయి, అప్లికేషన్ ఫారమ్ నింపండి.
4. వివరాలు సరిచూసుకుని సబ్మిట్ చేయండి.

జనవరి నెలాఖరులో ఈ ఈవెంట్ జరిగే అవకాశం ఉంది. పరీక్షల భయాన్ని పోగొట్టి విద్యార్థుల్లో ధైర్యాన్ని నింపేందుకు 2018 నుంచి ప్రధాని ఈ కార్యక్రమాన్ని నిర్వహిస్తున్న సంగతి తెలిసిందే.