మన పత్రిక: ఒడిశాలో జరిగిన రెండు వేర్వేరు రోడ్డు ప్రమాదాల్లో మొత్తం ఎనిమిది మంది ప్రాణాలు కోల్పోయారు. Odisha Road Accident ఘటనలకు సంబంధించి ఒకే రోజులో దేంకానాల్, కేంఝర్ జిల్లాల్లో ఈ విషాదాలు చోటుచేసుకున్నాయి. వివాహ వేడుకకు వెళ్లి వస్తున్న క్రమంలో దేంకానాల్ జిల్లాలో ఐదుగురు, కేంఝర్ జిల్లాలో ఒకే కుటుంబానికి చెందిన ముగ్గురు మృతి చెందారు.
దేంకానాల్ జిల్లా సదర్ ఠాణా పరిధిలోని మహిషాపుటా వద్ద గురువారం తెల్లవారుజామున ఒక ప్రమాదం జరిగింది. బుధవారం రాత్రి వివాహ వేడుకకు హాజరై కారులో ఏడుగురు స్వగ్రామానికి తిరిగి వస్తుండగా, వాహనం అదుపుతప్పి పక్కనే ఉన్న చెరువులోకి దూసుకెళ్లింది. స్థానికులు గమనించి ట్రాక్టర్ సాయంతో కారును బయటకు తీసినప్పటికీ, ఊపిరాడక ఐదుగురు అక్కడికక్కడే మరణించారు. మృతులను బంగురిసింగి గ్రామానికి చెందిన చంద్రకాంత్ స్వయిన్, అవినాష్ సాహు, అభిషేక్ సాహు, రాకేష్ సాహు, రామ్ సాహులుగా పోలీసులు గుర్తించారు. ప్రమాదంలో బయటపడిన మరో ఇద్దరిని చికిత్స కోసం దేంకానాల్ ప్రభుత్వ ఆసుపత్రికి తరలించారు.
మరో ఘటన కేంఝర్ జిల్లాలో బుధవారం రాత్రి జరిగింది. అనారోగ్యంతో ఉన్న కుమారుడిని కారులో ఆసుపత్రికి తీసుకెళ్తుండగా, వాహనం అదుపుతప్పి రోడ్డు పక్కన ఉన్న చెట్టును ఢీకొట్టింది. ఈ ప్రమాదంలో ఒకే కుటుంబానికి చెందిన ముగ్గురు అక్కడికక్కడే ప్రాణాలు విడిచారు. ఈ ఘటనలపై పోలీసులు కేసులు నమోదు చేసి విచారణ జరుపుతున్నారు.
Rajendar Degavath has three years of experience in content writing across education, employment, politics, technology, entertainment, and current affairs. He focuses on creating reliable, reader-friendly stories that explain important topics in simple language.