మన పత్రిక, మీరట్: ఉత్తరప్రదేశ్ రాష్ట్రంలోని మీరట్ జిల్లా హస్తినాపురంలో అత్యంత దారుణమైన హత్యోదంతం వెలుగుచూసింది. వివాహేతర సంబంధం, ఆర్థిక ప్రయోజనాల కోసం ఒక భార్య తన ప్రియుడితో కలిసి భర్తను పాము కాటుతో అత్యంత క్రూరంగా చంపేసింది. భందోరా గ్రామానికి చెందిన అతుల్ పన్వార్ (35) అనే వ్యక్తిని ఈ ఘటనలో కోల్పోయారు.
అతుల్, అతని భార్య దామిని కలిసి హస్తినాపూర్లో ఒక ప్రైవేట్ పాఠశాలను నిర్వహిస్తున్నారు. ఈ క్రమంలోనే పాఠశాల బస్సు డ్రైవర్ తుషార్తో దామినికి వివాహేతర సంబంధం ఏర్పడింది. వీరిద్దరి మధ్య అతుల్ అడ్డుగా మారుతున్నాడనే ఉద్దేశంతో, అతడిని శాశ్వతంగా వదిలించుకోవాలని నిందితులు నిర్ణయించుకున్నారు. అతుల్ పేరు మీద ఉన్న రూ.20 లక్షల ఇన్సూరెన్స్ సొమ్మును దక్కించుకోవాలని కూడా వారు పథకం వేశారు.
పాము కాటుతో హత్య
హత్యను సహజ మరణంగా చిత్రీకరించేందుకు నిందితులు వినూత్నంగా ఆలోచించారు. గురువారం రాత్రి దామిని తన ప్రియుడు తుషార్తో కలిసి నిద్రిస్తున్న భర్త అతుల్ బెడ్రూమ్లోకి విషపూరితమైన పామును తీసుకువచ్చారు. ఆ పాముతో అతడిని కాటు వేయించి హత్య చేశారు.
విచారణలో బయటపడిన నిజం
అతుల్ మరణంపై అనుమానం వ్యక్తం చేసిన పోలీసులు కేసు నమోదు చేసి లోతుగా విచారణ చేపట్టారు. నిందితుల కాల్ డేటా, ప్రవర్తనపై నిఘా ఉంచిన పోలీసులకు అసలు విషయం అర్థమైంది. ఇన్సూరెన్స్ డబ్బులు, వివాహేతర సంబంధం కోసమే ఈ హత్య చేసినట్లు నిందితులు ఒప్పుకోవడంతో వారిని పోలీసులు అదుపులోకి తీసుకున్నారు.
Farooq Basha is a content writer with two years of experience covering education, jobs, politics, technology, entertainment, and current affairs. He writes clear, accurate, and easy-to-understand articles for everyday readers.