Kodangal Municipal Election Results 2026: కొడంగల్‌లో రేవంత్ రెడ్డి మార్క్: 3 మున్సిపాలిటీలు క్లీన్ స్వీప్..

మన పత్రిక వెబ్​డెస్క్, వికారాబాద్/నారాయణపేట: తెలంగాణ ముఖ్యమంత్రి రేవంత్ రెడ్డి సొంత నియోజకవర్గం కొడంగల్‌లో కాంగ్రెస్ పార్టీ తన తిరుగులేని ఆధిపత్యాన్ని చాటుకుంది. నియోజకవర్గ పరిధిలోని మూడు మున్సిపాలిటీల్లోనూ కాంగ్రెస్ అభ్యర్థులు ప్రభంజనం సృష్టించి, మున్సిపల్ పీఠాలను ఏకపక్షంగా కైవసం చేసుకున్నారు. అభివృద్ధి మంత్రంతో బరిలోకి దిగిన హస్తం పార్టీకి ఓటర్లు పట్టం కట్టగా, ప్రతిపక్షాలు కనీస పోటీని ఇవ్వలేక చతికిలపడ్డాయి.

వికారాబాద్ జిల్లా పరిధిలోకి వచ్చే కొడంగల్ మున్సిపాలిటీలో ఫలితాలు కాంగ్రెస్ పార్టీకి ఏకపక్షంగా వచ్చాయి. మొత్తం 12 వార్డులకు గాను హస్తం పార్టీ ఏకంగా 10 స్థానాల్లో విజయం సాధించి క్లీన్ స్వీప్ చేసింది. ఇక్కడ బీఆర్ఎస్, ఎంఐఎం పార్టీలు చెరో ఒక్క సీటుతో సరిపెట్టుకున్నాయి. సీఎం సొంత గడ్డపై కాంగ్రెస్ పట్టు చెక్కుచెదరలేదని ఈ ఫలితాలు నిరూపించాయి.

నారాయణపేట జిల్లా పరిధిలోని మద్దూర్ మున్సిపాలిటీలో పోరు కాస్త హోరాహోరీగా సాగినప్పటికీ, అంతిమ విజయం కాంగ్రెస్‌నే వరించింది. మొత్తం 16 వార్డుల్లో కాంగ్రెస్ 9 స్థానాలను గెలుచుకుని మ్యాజిక్ ఫిగర్‌ను దాటేసింది. బీఆర్ఎస్ 6 స్థానాల్లో గెలిచి గట్టి పోటీ ఇచ్చినప్పటికీ, పీఠాన్ని దక్కించుకోలేకపోయింది. ఒక స్థానంలో స్వతంత్ర అభ్యర్థి విజయం సాధించారు.

ఇక కోస్గి మున్సిపాలిటీలోనూ కాంగ్రెస్ జైత్రయాత్ర కొనసాగుతోంది. మొత్తం 16 వార్డులకు గాను ఇప్పటివరకు వెల్లడైన ఫలితాల్లో 8 స్థానాలను కాంగ్రెస్ గెలుచుకుంది. మిగిలిన స్థానాల్లోనూ ఆధిక్యంలో ఉండటంతో ఇక్కడ కూడా హస్తం జెండా ఎగరడం ఖాయమైంది. విపక్షాలు ఇక్కడ ఇంకా ఖాతా తెరవకపోవడం గమనార్హం. మూడు మున్సిపాలిటీల్లో ఘనవిజయం సాధించడంతో రేవంత్ రెడ్డి వర్గీయులు, కాంగ్రెస్ శ్రేణులు భారీ ఎత్తున విజయోత్సవ ర్యాలీలు నిర్వహిస్తున్నారు.