CISF Impersonation Case 2026: ఎయిర్‌పోర్ట్‌లో నకిలీ CISF అధికారి అరెస్ట్.. కారణం వింటే షాకే!

మన పత్రిక, హైదరాబాద్: హైదరాబాద్‌లోని రాజీవ్ గాంధీ అంతర్జాతీయ విమానాశ్రయంలో సెంట్రల్ ఇండస్ట్రియల్ సెక్యూరిటీ ఫోర్స్ (CISF) అధికారిగా నటించిన ఓ నకిలీ వ్యక్తిని భద్రతా సిబ్బంది అదుపులోకి తీసుకున్నారు. సీఐఎస్ఎఫ్ యూనిఫాం ధరించి ఎయిర్‌పోర్ట్‌లో అనుమానాస్పదంగా తిరుగుతున్న ఇతడి బాగోతం సోమవారం రాత్రి వెలుగులోకి వచ్చింది.

సీ-లెవల్ ప్రాంతంలోని వాష్‌రూమ్ సమీపంలో ఫోటోలు తీసుకుంటుండగా క్విక్ రియాక్షన్ టీమ్ సిబ్బంది అతడిని అడ్డుకున్నారు. సరైన గుర్తింపు కార్డు లేకపోవడంతో పోలీసులకు అప్పగించారు. విచారణలో పోలీసులను సైతం ఆశ్చర్యపరిచే నిజాలు వెలుగుచూశాయి. గుంటూరు జిల్లాకు చెందిన బాలకృష్ణ సామన్ అనే ఈ వ్యక్తి, ఒక మహిళను ఆకర్షించేందుకే ఈ అవతారం ఎత్తినట్లు తేలింది.

తనకు ప్రభుత్వ ఉద్యోగం ఉందని సదరు మహిళను నమ్మించడానికి ఏకంగా విమానాశ్రయంలోకి వెళ్లి, యూనిఫాంతో ఫోటోలు దిగి వాట్సాప్‌లో పంపినట్లు విచారణలో వెల్లడైంది. అయితే, హై సెక్యూరిటీ ఉండే ఎయిర్‌పోర్ట్ లాంటి ప్రాంతంలోకి ఇలా నకిలీగా ప్రవేశించడం భద్రతా లోపాలను ఎత్తిచూపుతోందని పలువురు ఆందోళన వ్యక్తం చేస్తున్నారు. నిందితుడిపై కేసు నమోదు చేసిన పోలీసులు, ఇతని సోషల్ మీడియా కార్యకలాపాలు, గత చరిత్రపై దర్యాప్తు కొనసాగిస్తున్నారు.