సినిమాను దెబ్బతీయడానికే మోనాలిసా పెళ్లి: దర్శకుడు సనోజ్

మన పత్రిక వెబ్డెస్క్, మహేశ్వర్: ‘ది డైరీ ఆఫ్ మణిపూర్’ సినిమా ద్వారా హీరోయిన్‌గా పరిచయం అవుతున్న నటి మోనాలిసా భోంస్లే వయసుపై ఆ చిత్ర దర్శకుడు సనోజ్ మిశ్రా ఆరోపణలు చేశారు. మోనాలిసా ఇంకా మైనర్ అని, వయసు ధ్రువీకరణ పత్రాలను తారుమారు చేసి వివాహం జరిపించారని ఆయన ఆరోపించారు.

మోనాలిసా ఇటీవల కేరళలో ఫర్మాన్ ఖాన్ అనే వ్యక్తిని వివాహం చేసుకుంది. అయితే, తన సినిమా ప్రాజెక్టును దెబ్బతీసేందుకు పక్కా ప్రణాళికతో కొన్ని బృందాలు ఈ పెళ్లిని జరిపించాయని సనోజ్ మిశ్రా ఆరోపించారు. మోనాలిసా తన సినిమాలో నటించకుండా అడ్డుకునేందుకే ఈ కుట్ర పన్నారని ఆయన పేర్కొన్నారు.

మహాకుంభ్ సమయంలో మోనాలిసా వయసు సుమారు 16 సంవత్సరాలేనని దర్శకుడు అనుమానం వ్యక్తం చేశారు. ఆమె అసలు వయసును నిర్ధారించేందుకు వైద్య పరీక్షలు జరపాలని డిమాండ్ చేస్తూ, మహేశ్వర్‌ వెళ్లి ఆమె కుటుంబాన్ని కలుస్తానని ఆయన స్పష్టం చేశారు. ఒకవేళ వైద్య పరీక్షల్లో ఆమె మైనర్ అని తేలితే, భర్త ఫర్మాన్‌తో పాటు ఇతరులపై చట్టపరంగా కఠిన చర్యలు తీసుకోవాలని డిమాండ్ చేశారు.

మరోవైపు, మోనాలిసాకు జనవరిలోనే 18 ఏళ్లు నిండాయని ఆమె కుటుంబ సభ్యులతో పాటు పోలీసులు చెబుతున్నారు. ఈ నేపథ్యంలో దర్శకుడు సనోజ్ మిశ్రా చేసిన ఆరోపణలు ప్రాధాన్యం సంతరించుకున్నాయి.