నర్సింగ్ విద్యార్థులకు గుడ్ న్యూస్: జపనీస్, జర్మన్ భాషల్లో శిక్షణ..

మన పత్రిక వెబ్​డెస్క్, ఖమ్మం: తెలంగాణ విద్యార్థులకు అంతర్జాతీయ స్థాయిలో ఉపాధి అవకాశాలు కల్పించేందుకు ప్రభుత్వం ప్రణాళికలు రచిస్తోందని ముఖ్యమంత్రి రేవంత్ రెడ్డి తెలిపారు. ఖమ్మం జిల్లా పర్యటనలో భాగంగా ఏదులాపురంలో పర్యటించిన ఆయన.. దాదాపు రూ.362 కోట్ల విలువైన వివిధ అభివృద్ధి పనులకు శంకుస్థాపనలు, ప్రారంభోత్సవాలు చేశారు. ఈ సందర్భంగా నర్సింగ్ విద్యార్థులను ఉద్దేశించి మాట్లాడుతూ.. వారికి జపనీస్, జర్మన్ భాషలు నేర్చుకునేలా ప్రభుత్వం ప్రత్యేక కార్యాచరణను రూపొందిస్తోందని వెల్లడించారు.

ఇంజనీరింగ్ కంటే నర్సింగ్‌కే డిమాండ్ విదేశాల్లో మన విద్యార్థులకు ఉన్న అవకాశాలను సీఎం వివరిస్తూ.. “జపాన్, జర్మనీ వంటి దేశాల్లో ప్రస్తుతం ఇంజినీరింగ్ కంటే నర్సింగ్ విద్యార్థులకే అత్యధిక డిమాండ్ ఉంది. అయితే అక్కడ భాష ఒక్కటే మన వారికి అడ్డంకిగా మారింది. ఈ సమస్యను అధిగమించేందుకు ఆయా భాషలను ఇక్కడే బోధించేలా ఒప్పందాలు కుదుర్చుకున్నాం. త్వరలోనే నర్సింగ్ కాలేజీలకు జపనీస్, జర్మన్ భాషా నిపుణులను పంపిస్తాం” అని సీఎం భరోసా ఇచ్చారు.

రూ.362 కోట్లతో అభివృద్ధి పనులు ఈ పర్యటనలో భాగంగా సీఎం పలు కీలక ప్రాజెక్టులను ప్రారంభించారు:

• మున్నేరు నుంచి పాలేరు లింక్ కెనాల్ పనులకు శంకుస్థాపన.
• ఏదులాపురంలో జేఎన్‌టీయూ (JNTU) కళాశాలకు శంకుస్థాపన.
• కూసుమంచిలో 100 పడకల ఆసుపత్రి ప్రారంభం.
• మద్దులపల్లిలో నూతన మార్కెట్ యార్డు, ఏదులాపురం నర్సింగ్ కాలేజీ ప్రారంభోత్సవం.

అయోధ్య తరహాలో భద్రాద్రి విద్య, వైద్య రంగాలకు తమ ప్రభుత్వం అత్యధిక ప్రాధాన్యత ఇస్తోందని, పేదలకు నాణ్యమైన సేవలు అందించడమే తమ లక్ష్యమని రేవంత్ రెడ్డి స్పష్టం చేశారు. మద్దులపల్లి బహిరంగ సభలో మాట్లాడుతూ.. రాష్ట్రంలో రేషన్ కార్డు లేని అర్హులందరికీ కార్డులు మంజూరు చేస్తామని ప్రకటించారు. అలాగే, భద్రాచలం రాముల వారి ఆలయాన్ని అయోధ్య రామమందిరం తరహాలో అభివృద్ధి చేస్తామని హామీ ఇచ్చారు. ఈ కార్యక్రమంలో ఉప ముఖ్యమంత్రి భట్టి విక్రమార్క, మంత్రులు ఉత్తమ్ కుమార్ రెడ్డి, తుమ్మల నాగేశ్వరరావు, పొంగులేటి శ్రీనివాస రెడ్డి తదితరులు పాల్గొన్నారు.