మన పత్రిక: వినాయక చవితి పండుగను భక్తిశ్రద్ధలతో పాటు పర్యావరణ రక్షణను దృష్టిలో ఉంచుకుని జరుపుకోవాలని సినీ నటులు చిరంజీవి, విజయ్ దేవరకొండ ప్రజలకు పిలుపునిచ్చారు. ఈ పండుగ సందర్భంగా చేపట్టిన విత్తన గణపతి ఉత్సవాలకు వారు తమ మద్దతు ప్రకటించారు.
ఈ ఉత్సవాల్లో ప్రజలంతా భాగస్వాములు కావాలని విజయ్ దేవరకొండ కోరారు. ప్లాస్టర్ ఆఫ్ పారిస్ వంటి నీటి వనరులను కలుషితం చేసే పదార్థాలతో తయారుచేసిన విగ్రహాలకు దూరంగా ఉండాలని, కేవలం మట్టితో చేసిన వినాయక విగ్రహాలనే పూజకు ఉపయోగించాలని ఆయన విజ్ఞప్తి చేశారు. బాధ్యతాయుతంగా పండుగను నిర్వహించి పర్యావరణ కాలుష్యాన్ని తగ్గించడంలో ప్రతి ఒక్కరూ భాగస్వాములు కావాలని స్పష్టం చేశారు.
మెగాస్టార్ చిరంజీవి కూడా ఈ విత్తన గణపతి వేడుకలకు తన మద్దతును తెలియజేస్తూ, ప్రజలంతా భక్తిప్రపత్తులతో ఈ ఉత్సవాల్లో పాల్గొనాలని కోరారు. ఈ ప్రముఖ నటులిద్దరి మద్దతుతో విత్తన గణపతి వేడుకలకు విశేష ప్రాధాన్యం లభించింది.
దేశవ్యాప్తంగా వినాయక చవితిని విఘ్నేశ్వరుడి జన్మదినంగా అత్యంత వైభవంగా జరుపుకుంటారు. భక్తులు ఇళ్లలోనూ, బహిరంగ ప్రాంగణాల్లోనూ గణపతి విగ్రహాలను ప్రతిష్టించి, ప్రత్యేక పూజలు మరియు సాంస్కృతిక కార్యక్రమాలు నిర్వహిస్తారు. సహజ సిద్ధమైన మట్టి విగ్రహాలను పూజించడం వల్ల చెరువులు, ఇతర నీటి వనరులు కలుషితం కాకుండా కాపాడుకోవచ్చని, ఈసారి ఎక్కువ మంది ప్రజలు మట్టి విగ్రహాల వైపు మొగ్గు చూపుతారని భావిస్తున్నారు.
Mana Patrika Web Desk is our editorial team covering breaking news, education, jobs, politics, technology, entertainment, and current affairs. The team publishes clear, accurate, and reader-friendly updates after reviewing information from reliable sources.