మన పత్రిక: గుజరాతీ విజయవంతమైన చిత్రం ‘లాలో – కృష్ణ సదా సహాయతే’ తెలుగు రీమేక్లో శ్రీకృష్ణుడి పాత్ర కోసం కథానాయకుడు విజయ్ దేవరకొండను పరిశీలిస్తున్నట్లు ప్రచారం జరుగుతోంది. అంతకుముందు ఈ పాత్రకు రామ్ చరణ్ పేరు తెరపైకి వచ్చినప్పటికీ, ప్రస్తుతం విజయ్ దేవరకొండ పేరు పరిశీలనలో ఉన్నట్లు వార్తలు వస్తున్నాయి.
ఈ సినిమా రీమేక్ హక్కులను ప్రముఖ నిర్మాత దిల్ రాజు సొంతం చేసుకున్నట్లు సమాచారం. ఇందులో శ్రీకృష్ణుడి కీలక పాత్రకు విజయ్ దేవరకొండ అయితే సరిపోతారని భావిస్తున్నట్లు ప్రచారం నడుస్తోంది. అయితే ఈ అంశంపై దిల్ రాజు కాంపౌండ్ నుంచి గానీ, విజయ్ దేవరకొండ వైపు నుంచి గానీ ఎలాంటి అధికారిక ప్రకటన వెలువడలేదు.
చిన్న బడ్జెట్తో తెరకెక్కిన గుజరాతీ చిత్రం ‘లాలో’ బాక్సాఫీస్ వద్ద ఘన విజయం సాధించింది. సాధారణ వ్యక్తి జీవితంలోకి శ్రీకృష్ణుడు ప్రవేశించిన తర్వాత చోటుచేసుకునే పరిణామాల చుట్టూ ఈ భక్తిరస చిత్రం తిరుగుతుంది. ఆరంభంలో నెమ్మదిగా ప్రారంభమైనా, ప్రేక్షకుల ఆదరణతో ఏకంగా రూ.100 కోట్లకు పైగా వసూళ్లను సాధించింది.
తెలుగు ప్రేక్షకుల అభిరుచికి అనుగుణంగా ఈ రీమేక్ కథలో కొన్ని మార్పులు చేయనున్నట్లు తెలుస్తోంది. ఈ ప్రాజెక్టును అధికారికంగా ప్రకటించిన అనంతరమే దర్శకుడు, ఇతర నటీనటులు మరియు చిత్రీకరణ వివరాలు వెల్లడికానున్నాయి.
Rajendar Degavath has three years of experience in content writing across education, employment, politics, technology, entertainment, and current affairs. He focuses on creating reliable, reader-friendly stories that explain important topics in simple language.