సీఎం.. సీఎం.. అంటూ ఫ్యాన్స్ నినాదాలు: మహిళల గౌరవం, తన కొడుకుల పెంపకంపై ఎన్టీఆర్ ఆసక్తికర వ్యాఖ్యలు!

మన పత్రిక వెబ్​డెస్క్, బెంగళూరు: గ్లోబల్ స్టార్ జూనియర్ ఎన్టీఆర్ (NTR Jr) ఆదివారం బెంగళూరులో సందడి చేశారు. స్థానిక కిమ్స్ (KIMS) ఆసుపత్రిలో నూతనంగా నిర్మించిన స్పెషాలిటీ బ్లాక్‌ను ఆయన ప్రారంభించారు. అనంతరం జరిగిన అంతర్జాతీయ మహిళా దినోత్సవ వేడుకల్లో పాల్గొన్న తారక్.. మహిళా సాధికారత, తన వ్యక్తిగత జీవితం, కర్ణాటకతో ఉన్న అనుబంధంపై ఆసక్తికర వ్యాఖ్యలు చేశారు.

ఎన్టీఆర్ ప్రసంగంలోని ముఖ్యాంశాలు:

• మహిళలకు గౌరవం: “స్త్రీలను ఎలా గౌరవించాలో రోజూ పదేపదే చెప్పడం నాకు నచ్చదు. ప్రతి పురుషుడు పుట్టుకతోనే ఆ సంస్కారంతో ఉండాలి. నా ఇద్దరు కుమారులు కూడా మహిళలను గౌరవిస్తూ పెరిగేలా నేను వ్యక్తిగతంగా బాధ్యత తీసుకుంటానని మహిళా దినోత్సవం సందర్భంగా మాటిస్తున్నా” అని ఎన్టీఆర్ స్పష్టం చేశారు.
• అమ్మమ్మ గారి ఊరు: కన్నడలో ప్రసంగాన్ని ప్రారంభించిన తారక్.. కర్ణాటకతో తనకున్న అనుబంధాన్ని గుర్తుచేసుకున్నారు. “మా అమ్మ కర్ణాటకలోని కుందాపూర్‌లో జన్మించారు. బెంగళూరు వస్తుంటే నాన్న ఇంటి నుంచి అమ్మమ్మ ఇంటికి వచ్చినట్లు ఉంటుంది. 1983 మార్చి 20న మా తాతగారు (సీనియర్ ఎన్టీఆర్) ఇదే ఆసుపత్రికి శంకుస్థాపన చేశారు. మళ్లీ ఇన్నేళ్లకు నేను ఇక్కడికి రావడం నా పూర్వజన్మ సుకృతం” అని భావోద్వేగానికి గురయ్యారు.
• ‘సీఎం’ నినాదాలు – చిట్‌చాట్: ప్రముఖ వైద్యులు డాక్టర్ గురవారెడ్డి ఎన్టీఆర్‌తో సరదాగా ముచ్చటించారు. “25 ఏళ్ల తర్వాత ఎన్టీఆర్ ఏ పొజిషన్‌లో ఉంటారు?” అని ప్రశ్నించగా.. “25 ఏళ్ల తర్వాత ఎన్టీఆర్‌కు 67 ఏళ్లు వస్తాయి అంతే” అని తారక్ నవ్వేశారు. ఆ సమయంలో అక్కడున్న అభిమానులు ‘సీఎం.. సీఎం..’ అంటూ పెద్ద ఎత్తున నినాదాలు చేయగా, తారక్ చిరునవ్వులు చిందిస్తూ ఉండిపోయారు. ఒకవేళ డాక్టర్ అయితే ఏ స్పెషలిస్ట్ అవుతారని అడగగా.. పిల్లల ఎదుగుదల చూడటం ఇష్టం కాబట్టి ‘పీడియాట్రిషియన్’ (చిన్నపిల్లల డాక్టర్) అవుతానని చెప్పారు.

కొత్త లుక్‌లో అదుర్స్ (‘డ్రాగన్’ అప్‌డేట్): ఈ కార్యక్రమానికి ఎన్టీఆర్ సరికొత్త హెయిర్ స్టైల్, చెవికి రింగ్‌తో హాజరై అందరి దృష్టిని ఆకర్షించారు. ప్రస్తుతం ప్రశాంత్ నీల్ దర్శకత్వంలో తెరకెక్కుతున్న ‘డ్రాగన్’ Dragon (వర్కింగ్ టైటిల్) సినిమా కోసమే ఈ మేకోవర్ అని తెలుస్తోంది. ఈ చిత్రంలో రుక్మిణీ వసంత్ హీరోయిన్‌గా, బాలీవుడ్ నటుడు అనిల్ కపూర్ కీలక పాత్రలో నటిస్తున్నారు. ఎన్టీఆర్ పుట్టినరోజైన మే 20న ఈ సినిమా ఫస్ట్ లుక్ విడుదల చేసేందుకు సన్నాహాలు జరుగుతున్నాయి.