మన పత్రిక: దుబాయ్ నుంచి టెల్ అవీవ్ వెళ్తున్న ఫ్లైదుబాయ్ విమానం ఎఫ్‌జెడ్1073 (FZ1073) లో చోటుచేసుకున్న ఒక అత్యవసర ఘటనలో కెప్టెన్ స్మిత్ మచ్ఛర్ చూపిన సమయస్ఫూర్తి అందరి దృష్టిని ఆకర్షించింది. విమాన ప్రయాణంలో సహ పైలట్ ఆయనపై దాడి చేసి గాయపరిచినప్పటికీ, ఆ క్లిష్ట పరిస్థితుల్లోనూ విమానాన్ని నియంత్రించి 174 మంది ప్రయాణికులను సురక్షితంగా ల్యాండ్ చేశారు.
వివరాల ప్రకారం, సహ పైలట్ విమానాన్ని హైజాక్ చేయడానికి ప్రయత్నిస్తూ కెప్టెన్ స్మిత్ మచ్ఛర్‌పై దాడి చేసి గాయపరిచాడు. ఆ సమయంలో విమానంలో ప్రయాణిస్తున్న కొందరు వైద్య నిపుణులు స్మిత్‌కు ప్రాథమిక చికిత్స అందించారు. గాయపడినప్పటికీ స్మిత్ హైజాక్ అలర్ట్ కోడ్‌ను యాక్టివేట్ చేసి, విమానాన్ని దాదాపు 14,000 అడుగుల ఎత్తుకు దించారు. చివరకు సౌదీ అరేబియాలోని తబుక్ విమానాశ్రయంలో విమానాన్ని సురక్షితంగా ల్యాండ్ చేశారు. ప్రస్తుతం ఆయన సౌదీ అరేబియాలోని ఒక ఆసుపత్రిలో కోలుకుంటున్నారు.
గతంలో స్మిత్ ఒక పాడ్‌కాస్ట్‌లో మాట్లాడుతూ, విమాన ప్రయాణాల్లో అత్యవసర వైద్య పరిస్థితులు ఎదురైనప్పుడు ప్రయాణికులలో వైద్యులు లేదా నర్సులు ఉండటం ఎంతో సహాయపడుతుందని పేర్కొన్నారు. ఇప్పుడు ఆయనపై దాడి జరిగిన సమయంలో విమానంలోని వైద్య నిపుణులే ప్రాథమిక చికిత్స అందించి సహాయపడటం గమనార్హం.
టెక్స్‌టైల్ ఇంజనీరింగ్ నుంచి పైలట్‌గా ప్రస్థానం
స్మిత్ మచ్ఛర్ కుటుంబానికి టెక్స్‌టైల్ వ్యాపార నేపథ్యం ఉంది. మొదట్లో ఆయన కూడా కుటుంబ వ్యాపారంలోనే స్థిరపడాలని భావించి టెక్స్‌టైల్ ఇంజనీరింగ్ పూర్తి చేశారు. ఆ తర్వాత ముంబైలోని వెలింకర్ ఇన్‌స్టిట్యూట్ ఆఫ్ మేనేజ్‌మెంట్‌లో చేరారు. అయితే, మేనేజ్‌మెంట్ చదువుతున్న సమయంలో 19 ఏళ్ల వయసులో హాజరైన ఒక ఏవియేషన్ సెమినార్ ఆయన కెరీర్‌ను పూర్తిగా మార్చేసింది. విమానయాన రంగంపై ఆసక్తి పెంచుకున్న ఆయన, పైలట్ శిక్షణ కోసం న్యూజిలాండ్ వెళ్లారు.
సుదీర్ఘ విమానయాన అనుభవం
శిక్షణ పూర్తి చేసుకున్న తర్వాత స్మిత్ 2011లో స్పైస్‌జెట్ ఎయిర్‌లైన్స్‌లో కో-పైలట్‌గా తన ప్రస్థానాన్ని ప్రారంభించారు. బోయింగ్ 737 విమానాలను నడుపుతూ క్రమంగా సీనియర్ స్థానాలకు చేరుకున్నారు. స్పైస్‌జెట్‌లో 11 ఏళ్ల కాలంలో పైలట్-ఇన్-కమాండ్‌గా 6,400 గంటలకు పైగా విమానాలను నడిపిన అనుభవం సంపాదించారు. 2020లో లైన్ ట్రైనింగ్ కెప్టెన్‌గా బాధ్యతలు చేపట్టారు.
బోయింగ్ 737-800, 737 మ్యాక్స్ 8 మరియు 9 వంటి విభిన్న శ్రేణి విమానాలను నడిపిన స్మిత్, మొత్తం 9,750 గంటల విమానయాన అనుభవాన్ని కలిగి ఉన్నారు. ఆ తర్వాత జూన్ 2021లో ఆయన డైరెక్ట్-ఎంట్రీ కెప్టెన్‌గా ఫ్లైదుబాయ్ సంస్థలో చేరారు.
Rajendar Degavath has three years of experience in content writing across education, employment, politics, technology, entertainment, and current affairs. He focuses on creating reliable, reader-friendly stories that explain important topics in simple language.