మన పత్రిక, సినిమా: బాలీవుడ్ స్టార్ హీరో రణబీర్ కపూర్ ప్రధాన పాత్రలో ప్రముఖ దర్శకుడు నితీష్ తివారీ తెరకెక్కిస్తున్న పౌరాణిక చిత్రం ‘రామాయణ’పై ప్రేక్షకుల్లో భారీ అంచనాలు నెలకొన్నాయి. దాదాపు రూ.3000 కోట్ల భారీ బడ్జెట్తో రూపొందుతున్న ఈ చిత్రం 2026 నవంబర్లో దీపావళి కానుకగా విడుదల కానుంది. ఈ నేపథ్యంలో తాజాగా ఈ సినిమా టీజర్కు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) క్లియరెన్స్ ఇవ్వడం విశేషంగా మారింది. ‘రామ’ పేరుతో రాబోతున్న ఈ టీజర్కు సెన్సార్ బోర్డు గ్రీన్ సిగ్నల్ ఇవ్వడంతో ఏప్రిల్ 2న విడుదలకు మార్గం సుగమమైంది.
ఇక ఈ టీజర్ నిడివి 2 నిమిషాల 38 సెకన్లుగా ఉండగా, యూనివర్సల్ (‘U’) సర్టిఫికేట్ పొందింది. దీంతో అన్ని వయసుల ప్రేక్షకులు థియేటర్లలో వీక్షించవచ్చు. ఇప్పటివరకు చిత్రబృందం టైటిల్ వీడియోతో పాటు 3 నిమిషాల 3 సెకన్ల నిడివి గల ‘రామాయణ: ది ఇంట్రడక్షన్’ క్లిప్ను మాత్రమే విడుదల చేసింది. భారీ వీఎఫ్ఎక్స్ హంగులతో వచ్చిన ఆ వీడియోలో శ్రీరాముడిగా రణబీర్ కపూర్, రావణుడిగా యష్ లుక్స్ ఆకట్టుకున్నాయి. ఇప్పుడు రాబోయే టీజర్ ఎలా ఉంటుందోనన్న ఆసక్తి సినీ అభిమానుల్లో మరింత పెరుగుతోంది.