Kodad Municipal Election Results 2026: కోదాడలో ‘హస్తం’ సునామీ: 27 వార్డుల్లో క్లీన్ స్వీప్..

మన పత్రిక వెబ్​డెస్క్, సూర్యాపేట: సూర్యాపేట జిల్లాలోని కీలకమైన కోదాడ మున్సిపాలిటీ ఎన్నికల ఫలితాల్లో అధికార కాంగ్రెస్ పార్టీ తిరుగులేని విజయాన్ని నమోదు చేసింది. జిల్లావ్యాప్తంగా హస్తం హవా కొనసాగుతుండగా, కోదాడ ఓటర్లు కాంగ్రెస్ అభ్యర్థులకు బ్రహ్మరథం పట్టారు. ఏకపక్షంగా సాగిన ఈ ఫలితాల్లో విపక్షాలు కనీస పోటీని కూడా ఇవ్వలేక చతికిలపడ్డాయి.

మున్సిపాలిటీలోని మొత్తం 35 వార్డులకు జరిగిన ఎన్నికల తుది ఫలితాలు అందరినీ ఆశ్చర్యపరిచాయి. కాంగ్రెస్ పార్టీ ఏకంగా 27 వార్డుల్లో జయకేతనం ఎగురవేసి, మున్సిపల్ పీఠాన్ని భారీ మెజారిటీతో దక్కించుకుంది. కోదాడ గడ్డపై కాంగ్రెస్ తన రాజకీయ పట్టును మరోసారి నిరూపించుకుంది.

ప్రధాన ప్రతిపక్షంగా చెప్పుకునే బీఆర్‌ఎస్‌ పార్టీ ఇక్కడ దారుణంగా విఫలమైంది. ఆ పార్టీ కేవలం 3 వార్డులకే పరిమితమై ఘోర పరాజయాన్ని చవిచూసింది. ఆశ్చర్యకరంగా స్వతంత్ర అభ్యర్థులు (Independents) 5 స్థానాల్లో విజయం సాధించి బీఆర్ఎస్ కంటే మెరుగైన ఫలితాలు సాధించారు.

ఈ చారిత్రాత్మక విజయం నేపథ్యంలో కోదాడ పట్టణంలో పండగ వాతావరణం నెలకొంది. కాంగ్రెస్ శ్రేణులు భారీ ఎత్తున విజయోత్సవ ర్యాలీలు నిర్వహిస్తూ, రంగులు చల్లుకుంటూ సంబరాలు చేసుకుంటున్నారు. మున్సిపల్ చైర్మన్ ఎన్నిక ఇక లాంఛనమే కానుంది.