తొగుటలో యూరియా కొరతపై రైతుల ఆందోళన

మన పత్రిక, వెబ్​డెస్క్
రైతులకు యూరియా సరఫరాలో ప్రభుత్వం విఫలమైందని కాన్ గల్ సొసైటీ చైర్మన్ కె. హరికృష్ణారెడ్డి, బీఆర్ఎస్ నాయకుడు జీడిపల్లి రాంరెడ్డి, మాజీ మార్కెట్ కమిటీ చైర్మన్ దోమల కొమురయ్య ఆరోపించారు. తొగుట మండలంలో యూరియా కోసం రైతులు రాస్తారోకో చేపట్టడంతో వారికి మద్దతుగా నిలిచారు.

రైతులు గత రెండు రోజులుగా యూరియా కోసం రాత్రింబగలు తిరుగుతున్నారు. పండుగ, పబ్బం లేకుండా, వానా ఎండా లేకుండా చేతిలో ఖాళీ చేతులతో తిరుగుతున్నారు. ఇప్పటికైనా ప్రభుత్వం స్పందించాలని డిమాండ్ చేశారు. సిద్దిపేట జిల్లాలోని ఇతర మండలాలకు యూరియా సరఫరా చేస్తుండగా, తొగుట మండలానికి ఎందుకు సరఫరా చేయడం లేదని ప్రశ్నించారు. కాంగ్రెస్ ప్రభుత్వం అధికారంలోకి వచ్చి మార్పు తీసుకురావాలని ప్రజలు ఆశించారు. కానీ యూరియా కొరతతో పాత పరిస్థితులు తిరిగి వస్తున్నాయని వారు ఆవేదన వ్యక్తం చేశారు.

రైతుల నిరసన తర్వాత తొగుట సీఐ లతీఫ్, తహసీల్దార్ శ్రీకాంత్, ఏవో మోహన్ జిల్లా అధికారుల దృష్టికి తీసుకెళ్లారు. వారికి రెండు రోజుల్లో 4 లారీల యూరియా పంపిస్తామని హామీ ఇచ్చారు. రైతులకు ముందస్తు టోకెన్లు కూడా ఇస్తామని ప్రకటించడంతో ఆందోళన విరమించారు. రైతులు యూరియా కావాలి, కలెక్టర్ రావాలి, కెసిఆర్ రావాలి, రేవంత్ పోవాలి అంటూ నినాదాలు చేశారు. రాస్తారోకోతో రహదారిపై వాహనాలు నిలిచిపోయాయి. ప్రభుత్వం సకాలంలో చర్యలు తీసుకుంటే ఇలాంటి సమస్యలు తలెత్తవని స్పష్టమైంది.