కలెక్టర్లకు సీఎం చంద్రబాబు క్లాస్.. పాలనలో ఆ రెండూ ఉండాల్సిందే! | Chandrababu naidu

మన పత్రిక, వెబ్​డెస్క్: అమరావతిలో జరిగిన జిల్లా కలెక్టర్ల సదస్సులో సీఎం చంద్రబాబు పాలనాపరమైన అంశాలపై సుదీర్ఘంగా చర్చించారు. ఏ పని చేసినా పూర్తి వివరాలతో, స్పష్టతతో ముందుకు వెళ్లాలని సూచించారు. లక్ష్యాలను ముందే నిర్ణయించుకుని, అనుకున్న సమయానికి వాటిని పూర్తి చేసేలా అధికార యంత్రాంగం పనిచేయాలని స్పష్టం చేశారు. కేవలం రోజువారీ పనులు కాకుండా, ప్రభుత్వ లక్ష్యాలకు అనుగుణంగా జిల్లాల్లో పనులు సాగుతున్నాయా లేదా అన్నది ఎప్పటికప్పుడు సమీక్షించుకోవాలని తెలిపారు.

నిత్య విద్యార్థిలా ఉండాలి.. ప్రభుత్వంలో పనిచేసే ప్రతి అధికారి నిత్యం కొత్త విషయాలు నేర్చుకునే ధోరణిలో ఉండాలని సీఎం హితవు పలికారు. మంచి ఆలోచన ఎవరి నుంచి వచ్చినా స్వీకరించాలని, మారుతున్న పరిస్థితులకు అనుగుణంగా కొత్త విధానాలను అమలు చేయడంలో వెనుకడుగు వేయొద్దని చెప్పారు. పాలనలో స్థిరత్వంతో పాటు చురుకుదనం కూడా అంతే ముఖ్యమని, అప్పుడే ఆశించిన ఫలితాలు వస్తాయని అభిప్రాయపడ్డారు.

ఫలితాలు కనిపించాలి.. కేవలం నిబంధనలు, ప్రక్రియలు పాటించడమే సరిపోదని, తీసుకున్న నిర్ణయాల ఫలితాలు ప్రజలకు నేరుగా అనుభూతి కలగాలని చంద్రబాబు పేర్కొన్నారు. జిల్లా కలెక్టర్లే క్షేత్రస్థాయిలో ప్రభుత్వానికి ముఖచిత్రమని, వారి పనితీరుపైనే ప్రజల నమ్మకం ఆధారపడి ఉంటుందని వ్యాఖ్యానించారు. ప్రజల అవసరాలే కేంద్రంగా నిర్ణయాలు ఉండాలని, సమస్యలు వచ్చినప్పుడు వాయిదా వేయకుండా పరిష్కార దిశగా ఆలోచించాలని సూచించారు.

సాంకేతికతతో అవినీతికి చెక్.. ప్రభుత్వ సేవలను మరింత సులభంగా, వేగంగా ప్రజలకు అందించేందుకు ఆన్‌లైన్ విధానాలపై దృష్టి సారించినట్లు సీఎం తెలిపారు. దీనివల్ల సమయం ఆదా కావడంతో పాటు అవినీతికి ఆస్కారం తగ్గుతుందని చెప్పారు. జిల్లాల్లో ఈ డిజిటల్ మార్పులను వేగంగా అమలు చేయాలని కలెక్టర్లను కోరారు. అలాగే, గతంలో కొన్ని నియామకాల విషయంలో అభ్యంతరాలు వచ్చినా, న్యాయపరమైన చిక్కులను దాటుకుని ప్రభుత్వం ధైర్యంగా ముందడుగు వేసిన విషయాన్ని ఈ సందర్భంగా గుర్తుచేశారు.