మన పత్రిక: పాప్ సంగీత దిగ్గజం మైకిల్ జాక్సన్ జీవిత ఆధారంగా తెరకెక్కిన ‘మైకిల్’ బయోపిక్ చిత్రం భారతీయ ఓటీటీ ప్రేక్షకులకు అందుబాటులోకి వచ్చింది. జియోహాట్స్టార్ యాప్, వెబ్సైట్లోని ది పీకాక్ హబ్ ద్వారా ఈ సినిమా ప్రసారమవుతోంది. ఇంగ్లీష్, హిందీ భాషల్లో ఈ చిత్రాన్ని ప్రేక్షకులు వీక్షించవచ్చు. మైకిల్ జాక్సన్ జయంతిని పురస్కరించుకుని ఆగస్టు 29 శనివారం నుంచి ఈ సినిమా స్ట్రీమింగ్ ప్రారంభమైంది.
జాక్సన్ 5 నుంచి సోలో స్టార్ వరకు
ఆంటోనీ ఫుక్వా దర్శకత్వంలో జాన్ లోగన్ కథనంతో ఈ బయోపిక్ డ్రామా తెరకెక్కింది. మైకిల్ జాక్సన్ బాల్యం, తన సోదరులు జ్యాకీ, టిటో, జెర్మైన్, మార్లాన్లతో కలిసి ఏర్పరిచిన ‘జాక్సన్ 5’ గ్రూప్తో ప్రారంభమైన సంగీత ప్రస్థానాన్ని ఈ సినిమాలో చూపించారు. స్థానిక ప్రదర్శనల నుంచి అంతర్జాతీయ స్థాయిలో గుర్తింపు పొందే వరకు వారి తండ్రి జో జాక్సన్ మేనేజర్గా వ్యవహరించిన తీరు, ఆ తర్వాత మైకిల్ జాక్సన్ ప్రపంచంలోనే అతిపెద్ద సోలో కళాకారుడిగా ఎదిగిన విధానాన్ని ఇందులో పొందుపరిచారు.
ఈ చిత్రంలో మైకిల్ జాక్సన్ ఐకానిక్ ‘థ్రిల్లర్’ ఆల్బమ్ సమయంతో పాటు విక్టరీ టూర్, బ్యాడ్ వరల్డ్ టూర్ వంటి ప్రధాన వేడుకలను కవర్ చేశారు. వృత్తిపరమైన విజయాలతో పాటు గ్లోబల్ స్టార్డమ్తో వచ్చిన ఒత్తిడిని, ఆయన వ్యక్తిగత జీవితంలోని కోణాలను ఆవిష్కరించే ప్రయత్నం చేశారు.
నటీనటుల వివరాలు
మైకిల్ జాక్సన్ పాత్రలో ఆయన మేనల్లుడు జాఫర్ జాక్సన్ నటించారు. ఈ చిత్రం ద్వారా ఆయన వెండితెరకు పరిచయమయ్యారు. చిన్ననాటి మైకిల్ పాత్రను జూలియానో వాల్డీ పోషించారు. జో జాక్సన్ పాత్రలో కోల్మన్ డొమింగో, క్యాథరిన్ జాక్సన్ పాత్రలో నియా లాంగ్ కనిపించారు. మైకిల్ జాక్సన్ అటార్నీ జాన్ బ్రాంకా పాత్రను మైల్స్ టెల్లర్ పోషించగా, లారా హారియర్, జెస్సికా సులా, మైక్ మైయర్స్, లారెన్స్ టేట్, కేండ్రిక్ సాంప్సన్ ఇతర ముఖ్య పాత్రల్లో నటించారు.
బాక్సాఫీస్ వద్ద రికార్డు వసూళ్లు
ఈ బయోపిక్ అంతర్జాతీయ బాక్సాఫీస్ వద్ద సుమారు 1.021 బిలియన్ డాలర్ల గ్రాస్ వసూళ్లను సాధించి 1 బిలియన్ డాలర్ల మార్కును దాటింది. అమెరికా, కెనడాల్లో దాదాపు 372.3 మిలియన్ డాలర్లు వసూలు చేయగా, అంతర్జాతీయ మార్కెట్ల నుంచి సుమారు 649.12 మిలియన్ డాలర్లు వచ్చాయి. ప్రపంచవ్యాప్తంగా 1 బిలియన్ డాలర్ల మైలురాయిని అందుకున్న మొదటి బయోపిక్ చిత్రంగా, ఈ విభాగంలో అత్యధిక వసూళ్లు సాధించిన సినిమాగా ఇది నిలిచింది.
స్ట్రీమింగ్ ప్రారంభానికి ముందు, జూన్ 9, 2026 నుంచి డిజిటల్ రెంటల్, పర్చేజ్ విధానంలో ఈ సినిమా అందుబాటులో ఉంది.
Rajendar Degavath has three years of experience in content writing across education, employment, politics, technology, entertainment, and current affairs. He focuses on creating reliable, reader-friendly stories that explain important topics in simple language.