మన పత్రిక: విద్యుత్ వాహనం (EV) నడుపుతున్నప్పుడు మధ్యలో ఛార్జింగ్ అయిపోతే కలిగే ఇబ్బందికర పరిస్థితిని ఎదుర్కొన్న ఒక యువతికి భారత ఆర్మీ జవాన్ ఆపద్బాంధవుడిలా సాయం అందించారు. ప్రముఖ కంటెంట్ క్రియేటర్, వ్లాగర్ దీపికా శర్మ తన విద్యుత్ కారులో ప్రయాణిస్తుండగా, ఛార్జింగ్ అంచనా వేయడంలో పొరపాటు జరగడంతో కారు నడిరోడ్డుపై ఆగిపోయింది. చుట్టుపక్కల ఛార్జింగ్ స్టేషన్ లేక ఆమె ఆందోళన చెందుతున్న సమయంలో అటుగా వచ్చిన నరేంద్ర అనే ఆర్మీ జవాన్ ఆమెకు అండగా నిలిచారు.
సహాయం అందించిన ఆర్మీ జవాన్
జవాన్ నరేంద్ర ఏమాత్రం ఆలోచించకుండా రంగంలోకి దిగి, ఆగిపోయిన కారును సమీపంలోని ఈవీ ఛార్జింగ్ స్టేషన్ వరకు స్వయంగా తోసుకుంటూ వెళ్లారు. కేవలం కారును తోసి వదిలేయకుండా, కారుకు తగినంత ఛార్జింగ్ ఎక్కి, ఆమె సురక్షితంగా ప్రయాణం ప్రారంభించేంత వరకు జవాన్ అక్కడే వేచి ఉండి తోడుగా నిలిచారు. వెళ్లే ముందు ఆమెకు సరైన మార్గాన్ని కూడా సూచించారు. ఈ హృదయపూర్వక ఘటనను దీపికా శర్మ వీడియో తీసి తన ఇన్స్టాగ్రామ్లో పంచుకోగా, ప్రస్తుతం ఈ వీడియో నెట్టింట వైరల్గా మారింది.
నెటిజన్ల ప్రశంసలు
దీపికా శర్మ ఈ వీడియోకు ‘కొందరు హీరోలు క్యాప్స్ ధరించరు, భారత సైనిక యూనిఫాం ధరిస్తారు’ అంటూ క్యాప్షన్ ఇచ్చారు. జవాన్ నరేంద్ర చూపించిన సహనం, నిస్వార్థమైన సాయాన్ని తానెన్నటికీ మర్చిపోలేనని ఆమె కృతజ్ఞతలు తెలిపారు. ధైర్యంతో పాటు మానవత్వంతో దేశానికి సేవలందిస్తున్న భారత సైన్యానికి ఈ వీడియోను అంకితం చేస్తున్నట్లు ఆమె పేర్కొన్నారు. జవాన్ చేసిన ఈ సాయంపై సోషల్ మీడియాలో నెటిజన్లు ప్రశంసల వర్షం కురిపిస్తున్నారు.
Farooq Basha is a content writer with two years of experience covering education, jobs, politics, technology, entertainment, and current affairs. He writes clear, accurate, and easy-to-understand articles for everyday readers.